मन करु सुमिरन राधा, हैं जीवन धन राधा।
श्यामहुँ स्वामिनी राधा, जय जयति जयति राधा।।
रटु नित्य नाम राधा, नित गाऊं गुनन राधा।
नित ध्यावहुं छवि राधा, जय जयति जयति राधा।
विधि हरि हर भज राधा, भज उमा रमा राधा।
भज बनितन राधा , जय जयति जयति राधा।।
देखहुं तो छवि राधा, सुनु तो बैनन राधा।
परसहुं तो पग राधा, जय जयति जयति राधा।।
तेरी गति है राधा, तेरी मति है राधा।
तेरी रति है राधा, जय जयति जयति राधा।।
गहु चरण शरण राधा, भव बाधा हर राधा।
चह हरिहुँ कृपा राधा, जय जयति जयति राधा।।
अवढरदानी राधा, ब्रजरस खानी राधा।
ब्रज ठकुरानी राधा, जय जय श्री राधा।
